KHudi ho ilm se mohkim to ghairat-e-jibril
Agar ho ishq se mohkim to sur-e-israfil
Azab-e-danish-e-hazir se ba-khabar hun main
Ke main is aag mein Dala gaya hun misl-e-Khalil
Fareb-KHurda-e-manzil hai karwan warna
Zyyaada rahat-e-manzil se hai nashat-e-rahil
Nazar nahin to mere halqa-e-suKHan mein na baiTh
Ke nukta-ha-e-KHudi hain misal-e-tegh-e-asil
Mujhe wo dars-e-farng aaj yaad aate hain
Kahan huzur ki lazzat kahan hijab-e-dalil
Andheri shab hai juda apne qafile se hai tu
Tere liye hai mera shola-e-nawa qindil
Gharib o sada o rangin hai dastan-e-haram
Nihayat is ki husain ibtida hai ismail